من الواسوق ابت تطلع
من الابرول ابت تطلع
مـن الأقلام ابت تطلع
من المدفع طلع خازوق
خوازيق البلد زادت
يفيض النيل نحيض نحنا
يظل حال البلد واقف تقع محنه
ولا النيل القديم ياهو ولا يانا
نعاين فى الجروف تنهد ولا يانا
رقاب تمر الجدود تنقص ولا يانا
متين ايد الغبش تتمد
لا قدام ... ولا قدام
تتش عين الضلام بالضو
تفرهد شتله لا هدام
ولا فيضا يفوت الحد
عقب يا نيل تكون ياكا
ونكون أهل البلد بالجد
يا مطر عز الحريق
يا مصابيح الطريق
يا المراكبيه البتجبد من فك الموج الغريق
جينا ليك والشوق دفرنا
يا نشوق روحنا ودمرنا
يا المحطات الحنينه

 القصرت مشوار سفرنا
ياما شايلك بيني حايم
لا الليالي المخمليه
لا العمارات السوامق
لا الاسامي الاجنبية
تمحى من عيني ملامحك
انت جاية المغربيه
داقسه دايشه المغربيه
وشك المكبوت مكندك
سمسمونايتك زمزميه
كون شبر طوريه منجل
سبحه,فانوسا مدردح
قلتى بيهن لي زمانك
يا زمان الحاجة عندك
يا زمان الآهة حدك
لا تطأ الوردة الصبيـة