رجعلك قليبي المهضلم
يراجع صنوف الغناوي العصية
يراجع معاك الكلام القبيل استباك
الكلام المبهرج وخاوي
الكلام المزيف
ولافيه غير احتلام وانفصام
تموت الحروف يوم تقوم القصائد
مقام الطبول والبخور
بشوفك جرايد شواكر حوامد
ولاهامي فيها
عليها المصائب تمام التمام
مغايص بتفرم حشاها
وغبائن بتنفخ بطون البسفو التراب
وحايح لهيب البتلفح تلهلب وتكوى الجلود
اتف القصائد
اذا ما القصائد دايره ليك البكا
البصاحب رضا السردار
واتف القصائد إذا ما القصائد
بتنزل مريده وتسبح بحمد الذي
ابتلاك وهداني الودار
طريتك وأنا الكنت قايل
خيالك معشعش جواي
سكنتك وما لاقى فجة
أخير لك أقول البحرق حشاي
أخير لك أفضفض جراب الخبايا
أقول الكلام البفكفك سوارك
يوقف جدارك ويرفع عضايا
تضيع الرموز التغتي الكلام
أقول السكاكر ابتني ورمتني وكفانا
أقول العساكر تباري الكباري
وتفتش قلوب الجهال الشلوخهم هويه
واغني الزيود والكنانة
كضب
اقول البنات البفتحن صدورن
يقالدن رشاشك ويخلن حبيبن
كضب
مراحك يعشي ويفشي
خضارك مرطب يندي الضهاري
ترابك دخن لو زرعتو الحجارة
بلادك ولادك كروها السحالي
تسفر سعيتك تقنب تبارى
الجداد العقالي
تجوع يا البشدر خريفك
سوا في البطانة
ويمطر رزازك عزازا حصايا
وقموحك سنابل مشاط كردفاني
ابيت الكلام المغتغت وفاضي
وخمـج ...
ولادك قصادك شعاع التحايا
يضووا الشقوق التلم الدوابي
يوروا الدروب للقلوبهم عمايا
عرقهم حبالك
وصوتهم مشانق
تلم الدقون الكبيرة
وتحدر فقر سمنتها الليالي الضليمة
بتهدر حرائق وتحمي البياكلوا المطايب
وتسجن بطون الجياع العرايا
وشوشهم سمر حر اباطك
صفوفهم مرامك وحلمك حلمهم
رغيفه وكرامة وسلامه
مصانع بتحرق قبل تبدا فيها
مزارع بتيبس ونيلك ممدد جنازة
وعقيدك وسيدك بيكتب ويمحى
وتبقى المحايا