كان نفسي اقولك من زمان

للكاتمو في سري ومكتم في حشاي

مدسوس سنين ...

للشايلو في عيني معزة  وفي القلب

ريدا يخاف و الغربة و الشوق والحنين

زاملني زي خاطر الفرح

وكتين يقاسم الهم عذاب

وكتين مدامعي تكون جزا

تفتح مباهج الليل ظنون

كان نفسي اقولك من زمان

خطوة محاسنك عندي ما كسرة جفون

وقت العيون تعبرني زي خاطر المسا

خطوة محاسنك ما الرخام الفي الحرير

وقت الثغير يعبرني بحرفاً قسا

خطوة محاسنك عندي وكتين كبريائي ينهزم

لطيبتي بلفظة حنان

وكتين مشاعرك تنسجم في عمري

تنفح قلبي بيرعشت امان

خطوة محاسنك وكتين شوقي

يصبح في هواك  ليل عزة ما بتعرف هوان

كان نفسي اقولك من زمان

عينيك غربتي واهلي وبلادي الفيها ضايع لي زمن

عينيك شوقي لزولاً ولوف

من بعدو ساب عيني سهن

وانا كنت داير من زمان اشرح

حكايتي معاك  الف احكيك وازيد القول ولف

واتمنى لو قلبك عرف كان  من زمان

من قبل ما في قلبي يتحسر زمان الفرقة في جرح الاسى

من قبل ما حرف الحقيقة الحلوة يتبدل عسى

ويصبح اماني في خاطر الحنان

كان نفسي اقولك من زمان