كتبت ليك ...

لا بيني بينك ريدة لا قصة غرام

لا قصدي الهو معاك بي كلمات غناي ..

لا شعري ليك مرجيحة من شعر الغمام

كتبت ليك والله يا قمر الزمان

كتبت ليك وانا جاي من زمن الشقا

المرسوم على وش الثواني مظللة

تمر الساعات سنين

تتفتح الازهار جميلة ومذهلة

مشتاق افتش نسمة في زمن العذاب

وايامي من كتر الاسى وكتر العزوف والاغتراب

صارت حرف مترهلة

لحظات اسيفة ومهملة

كتبت ليك ووقفت ليك

لا من لقيتك جاية في قلب الطريق

وشفت فيك راحة المشاوير البعيدة

ولمحة النسمة الحنينة الجاية من جوف المضيق

حسيت عجايب الدنيا اتلمت  بقت ..

جاياني من عصر سحيق ..

عينيك حس اطفال ينادو القمرة

للغايب يعود

وجبينك الضواي حجا الحبوبة ..

في الزمن السعيد

وانا في قساوة الموحش الزمن المكهرب بالحريق ..

وانا حيلتي ايه قولي يا قمر الزمان

غير اتكي واحلم معاك واحضن اماسي الصحوة ..

والامل البريق...